श्रीकांतजी त्यांच्या व्यवसायामधे अत्यंत व्यग्र असूनही सामाजिक कार्यात विशेष रूची घेतात. आपल्या मातोश्रींच्या स्मरणार्थ वरवडे (जि. रत्नागिरी) गांवात त्यांनी ज्युनियर कॉलेजपर्यंत साकारलेलं ज्ञानमंदिर जिथे आज ३००० हून अधिक विद्यार्थी शिक्षण घेतात ही त्याची साक्ष आहे. तसंच कंपनीच्या माध्यमातून ॲनालिटिकल केमिस्ट्रीचे ॲडव्हान्स सर्टिफिकेट कोर्ससाठी पुण्याच्या स.प. महाविद्यालयामधे मार्गदर्शन केलं जातं. याचबरोबर ॲनॅलिटीकल इन्स्ट्रुमेंटच्या पदव्युत्तर पदविकेसाठी ठाण्याच्या बेडेकर कॉलेजला भरीव सहकार्य केलं जातं. लहान मुलांच्या सर्वांगीण प्रगतीसाठी ते ‘वयम्’ नावाच्या एका आदर्श मासिकाचं प्रकाशन करतात ज्याची सभासदसंख्या ६५०० एवढी आहे. तसेच या मासिकाला आजवर अनेक स्थानिक आणि राज्य पुरस्कार लाभले आहेत. गरजू युवा बॅडमिंटनपटूंना ते आर्थिक सहाय्य करतात. दापोलीतील वणौशी सारख्या निसर्गरम्य ठिकाणी क्रीडाप्रेमींसाठी ‘मिनी स्पोर्ट्स कॉम्पलेक्स’ देखील त्यांनी सुरु केला आहे.