कोकणातील नांदिवडेसारख्या छोट्याशा निसर्गरम्य खेडेगांवात जन्मलेले श्रीकांत यांचं प्राथमिक शिक्षण नजीकच्या मालगुंडमधे झालं आणि घरच्या गरिबीमुळे व त्यांची तल्लख बुध्दी पाहून पुढील शिक्षणासाठी त्यांच्या मामाने त्यांना आपल्या पुण्यातील घरी नेलं. तिथे इंटर सायन्स उत्तीर्ण करून मोठ्या कष्टांनी डीईआरई ही पदविका मिळवली. आपल्या विषयामधे पारंगत आणि अंगहुशारीच्या बळावर नोकरीच्या काळातच त्यांनी तंत्रकुशलता प्राप्त केली. गॅस क्रोमॅटोग्राफसारख्या महत्वाच्या व आयात पर्यायी यंत्राची निर्मिती आरेखनापासून उत्पादनापर्यंत करून त्यांनी मालकाचीच नाही तर या क्षेत्रातील अनेकांची प्रशस्ती मिळवली.