आसपास जाणवणारा वसंत ऋतू- स्पर्धा निकाल 2022

आसपास जाणवणारा वसंत ऋतू स्पर्धा- विजेत्यांचे अभिनंदन.

‘वयम्’ मासिकाच्या मार्च महिन्याच्या अंकात आसपास जाणवणारा वसंत ऋतू ही स्पर्धा आयोजित करण्यात आली होती. यामध्ये वसंत ऋतूत दिसणारं सृष्टीचं लोभस रूप निबंध किंवा चित्र स्वरुपात पाठवायचं होतं. या स्पर्धेला मुलांनी भरभरून प्रतिसाद दिला. या स्पर्धेचं परीक्षण ‘वयम्’च्या लेखिका कांचन जोशी आणि संपादक शुभदा चौकर यांनी केलं. नेहमीप्रमाणे एक, दोन असे क्रमांक न काढता- उत्तम निबंध लेखन चार आणि सुंदर चित्र रेखाटलेले विजेते पाच अशी निवड करण्यात आली आहे. या सर्वांचे विशेष अभिनंदन!

परीक्षकांचे मनोगत

नमस्कार बालदोस्तांनो!

‘वयम्’ने घोषित केलेल्या स्पर्धांना तुम्ही नेहमीच भरभरून प्रतिसाद देता याचा ‘वयम्’ टीमला आनंदच आहे. पण एक गोष्ट परीक्षण करताना प्रकर्षाने जाणवली ती म्हणजे तुमचं मत, तुम्हांला काय वाटलं? तुम्ही काय पाहीलं? हे अपेक्षित असताना बरीच मुलं सर्वसाधारण मत, पुस्तकी भाषा आणि वर्णन यातच अडकलेली आहेत. असं का बरं होतंय?

बदललेल्या पाठ्यपुस्तकातही स्वाध्यायांमधून तुमचं मत, निरीक्षणं यावर आधारित प्रश्न आहेत. मग? लिहीणार ना यापुढे स्वतः विचार करुन स्वतःच्या भाषेत? तुम्ही जे पहाता, जे अनुभवता, जे तुम्हाला वाटतं ते तुमच्या भाषेत लिहाल तेव्हा एक आगळाच आनंद तुम्हांला मिळेल, तो ही अनुभवा!